คำนิยม
ของหลวงพ่อพระครูมนูญญชยาจารย์
เจ้าอาวาสวัดสว่างอารมณ์ ในเมืองร้อยเอ็ด
ขอเชิญชวนพี่น้องท้องถิ่นไทยอีสาน มีธรรมบรรณาการสู่ประชาชาวบ้าน
ควรแสวงหาไว้ยามสนใจได้อ่าน เป็นตำนานกล่าวไว้ใบลานนั้นแต่นาน
สังข์ศิลป์ชัยบอกไว้นิทานเก่าโบราณ แปลมาเป็นความไทยใส่ใจบ่มีคร้าน
เพื่อลูกหลานภายซ้อยยามเหงาพอได้อ่าน กว่าสิพิมพ์ออกได้เอาใจตั้งแต่นาน
เวสสันดรชาติอ้างมีเรื่องหนึ่งมานำ ขอให้บารมีให้ช่อยชูนำค้ำ
สร้างหนังสือนี้ไว้คุณพระธรรมหลิ่งล่ำ อาจารย์มั่นแต่งไว้ให้เฮาได้ช่อยนำ
เฮาฟังเทศน์ซู่มื้อนี้บ่ฮู้แห่งคำสอน เขียนออกเป็นคำกลอนอ่านไปสิหายฮ้อน
คำบาลีเขียนไว้ในใบลานใจอ่อน เพิ่นจึ่งคิดซอกค้นมาได้จึ่งแต่งกลอน
ขอวอนพวกพี่น้องในท้องถิ่นดินไทย ให้พากันสนใจจั่งสิเป็นไปได้
พวกคนไทยเฮานี้พากันเอาใจใส่ คำสอนสิอยู่ได้หลานหล้าให้ใส่ใจ
ควรที่หาซื้อไว้ให้เป็นมิ่งมงคล มีธรรมประจำใจจึ่งสิเอาตนพ้น
สิเสียใจภายหน้าคราวหลังบ่ได้บ่น ควรที่พวกพี่น้องให้หาไว้ซู่คน
อันหนึ่งดีลื่นล้นคำกาพย์พระพิฑูร เป็นคำสอนสมบูรณ์เฒ่าเก่าเฮาเคยคุ้น
ลูกหลานภายลุนได้จำไปให้ใจอุ่น ปฏิบัติฮีตเค้าคลองเฒ่าสิมั่งมูล
นำไปจ่ายกาพย์เซิ้งยามแห่บุญบั้งไฟ เป็นคำสอนจิตใจทั่วไปให้ฟังไว้
ฝูงหมู่คนหนาใบ้ไทเมธีปราชญ์ใหญ่ ทั้งนายไพร่พ่อค้าควรสิได้ใส่ใจ