กลอนธรรมะ (ภาคภาษาอีสาน 2)

            โตเป็นศิษย์ให้ฮู้สูงต่ำให้ยำเกรง                อย่าเป็นศิษย์นักเลงล่วงเกินบ่มีย้าน

ยมภิบาลหมายไว้ตายไปเพิ่นสิไล่                          เห็นครูใจแผ่กว้างโตซ้ำสิล่วงเกิน

ตกกะเทินว่าได้เป็นศิษย์แล้วอย่าตีตนเสมอท่าน   คุณอาจารย์ให้เจ้ายกใส่เกล้าตัวเจ้าสิฮุ่งเฮือง

อันนี้เดียงหัวข้อพอคนแจ้งสว่าง                           พอเป็นทางส่องขึ้นเมืองฟ้าสู่สวรรค์

เถิงเมื่อยามนั่งนั้นให้เจ้าคิดหาคลอง                      เถิงยามนอนให้คิดหาคุณแก้ว

คันเจ้านอนหลับแล้วเถิงยามให้เจ้าตื่น                  ลุกหาฟืนนึ่งข้าวเอาไว้ให้ท่วงทัน

จังหันพร้อมภาช์เพลให้เจ้าแต่ง แพงเอ้ย                เถิงยามแลงและเช้าตัวเจ้าให้ล่ำคอย

อย่าคิดแต่นำลูกน้อยลอยห่างสิเสียงาน                  ให้คิดถึงอาจารย์หน่อพุทโธองค์ล้ำ

ศีลธรรมจำเอาไว้ภาวนาทุกเช้าค่ำ                          ธรรมพระพุทธเจ้าให้เอาไว้ใส่ใจ..ฯลฯ...

            ยูท่างยอมือไหว้พุทโธธรรมทุกเช้าค่ำ         ทางผู้นำก็พร้อมดีแล้วคู่ซู่แนว

พระเจ้าอยู่หัวล้วนแล้วแนวหน่อใจบุญ                  ข้าขอทูลเหนือหัวให้อยู่ยืนยาวด้วย

ข้าขออวยพรให้กษัตริย์ไทยตุ้มไพร่                        คุณพระรัตนตรัยเหลื่อมกุ้มกวมเจ้าเผ่าสกุล

อย่าให้สูญเสียเสี่ยงเมืองไทยเอกราช                       ฝูงหมู่ญาติพี่น้องกะคองซ้นฮ่มพระองค์

ให้เพิ่นทรงยืนหมั้นพันปีอย่าขูหล่น                        ประชาชนทุกด้านทหารพร้อมช่อยระวัง

ให้ได้เป็นฉัตรกั้งกวมประเทศไทยแลนด์                แสนนครเขาขามอ่อนยอมขอน้อม

ขอให้อินทร์พรหมพร้อมเทวดาให้มาช่วย                กับทั้งครุฑนาคด้วยมาช่วยท่านพระองค์

ผู้เพิ่นทรงเทียมข้างนางพระยาฟ้ากระเดื่อง              หลายหัวเมืองนับล้าน บ่ปานข้างฝ่ายคีง  เพิ่นแหล่ว

อันว่าลูกแก่นแก้วแนวหน่อกษัตรา                          หาผู้มาเทียมทันกลั่นเอาบ่มีได้

จักแม่นเทพาไท้ทางได๋มาบังเกิด                              สิ่งประเสริฐลื่นล้นคนย้านหย่อนขาม

ทังโฉมงามพระองค์น้องได้ครองเมืองตุ้มไพร่          สมชื่อเทพท่อนไท้พระอินทร์ให้ป่อนลง

ได้มาทรงเมืองสร้างตามพระองค์ใช้ช่วง                  เพิ่นมีใจแผ่กว้างปวงข้าได้เพิ่งบุญ

ต่อไปชาติหน้าพุ้นข้าขอเพิ่งบารมี                            กับทั้งองค์กษัตรีผู้ลุนพระองค์น้อง

ขอให้มองดูข้าคนชราผู้เขียนเรื่อง                             เมืองร้อยเอ็ดเขตเบื้องอีสานย้องซั่วแซว

อยากเห็นพระยอดแก้วแซวซั่วกันหมด                    ไปนำเรือนำรถกะนบหาพระคุณท่าน

ฝูงหมู่หลานเหลนหล่อนที่หลอนมาเกิดใหม่             ให้เขาได้พบหน้าบูชาท่านคู่ซู่คน  แด่เด้อ

องค์พระชนนีข้าขออวยพระพรส่ง                             ให้เพิ่นทรงอยู่หมั้นอย่าผันย้ายห่างหนี

อายุพระแม่นี้ให้ยืนชั่วพันปลาย                                  วรรณะกรายกลับคืนดั่งสาวสวรรค์ฟ้า

                                                          back    next