กลอนธรรมะ (ภาคภาษาอีสาน)
จั่งว่าฮักกันไว้สิดีกว่าชังกัน มีหัวมันหัวกลอยกะค่อยปันกันต้ม
อย่าให้สมความเว้ายามเขาดูหมิ่นเฮาเด้อ คันซู่คนซู่แหงนหน้าเท้อเล้อแนวนี้สิบ่ดี
จั่งว่าสามัคคีสามัคคานังนั้นตาโปสุโขอยู่ พระพุทธองค์ผู้ฮู้สอนไว้ให้ใคร่ครวญ
อย่าได้ชวนกันเล่นนอนเว็นบ่ฮู้ตื่น ........................ฯลฯ...........................
อันว่าโบกและไพ่ชนไก่แทงโป ได้ยินเสียงเขาโฮอย่าแล่นซำตาตั้ง
ให้เจ้าฟังเอาถ่อนคำสอนของแม่ คันเจ้าเฒ่าแก่แล้วสิหลงโอ้เมื่อลุน
ทุนที่เฮาไปเล่นเสียไปสิยากใหญ่ ใจกะสิเสียเมียกะสิป้อยเด็กน้อยกะสิเอิ้นเป็นเพื่อนหมู่เดียว
ให้เจ้าเหลียวดูถ่อนคำสอนพระเจ้ากล่าว คันเป็นบ่าวนายบ่เลี้ยงเมืองบ้านสิหม่นหมอง
คันเป็นทองอย่าให้เป็นทองเก้ปนเปกับขี้กั่ว ละความชั่วถิ่มไว้ให้เฮาใช้แต่บ่อนดี แม่เด้อ
อันหนึ่งคันเจ้ามีความรู้ได้เป็นครูสอนหมู่ ให้เป็นครูแท้ ๆ อย่าเป็นคู้ขู่เข็ญ
มันจักเป็นเวรฮ้ายเป็นครูให้เขาขู่ สอนนักเรียนบ่ฮู้เขาสิสู้ทักทวง
คิดให้มันกว้าง ๆ ตวงเบิ่งให้มันดี อย่าไปตีเด็กเฉยดั่งเคยพานพ้อ
คันเป็นหมอกะให้เป็นหมอแท้อย่าผันแปรเป็นหม่อ ตรวจหาโรคบ่พ้ออย่างอเอิ้นสั่งยา
คันได้เป็นพ่อค้าอย่าหาแต่ทางโกง เงินในถงไผมันก็ดั่งกันผู้เขาซื้อ
กินตะพือมันห้วนบ่ชวนคนเข้ามานั่ง ยามคนหลั่งเข้าบ้านจาต้านให้ม่วนหู
เฮาขายดู๋ เฮาคงได้กินกำไรพอควรแด่ อย่าเห็นแต่ท่าได้มันสิไหม้เมื่อลุน
อย่าฟ้าวฉุนเฉียวฮ้อนบทกลอนบ่ทันม่วน สอนผู้ชายครบถ้วนสิคืนม้วนใส่ผู้หญิง
ให้เจ้าหลิงแลเรื่อยเฮือนชานบ้านช่อง อย่าเป็นหญิงจองหองคันผัวมีอยู่ซ้อนอย่าไปส่อนผู้อื่นนำ
จักเป็นกรรมภายหน้าพาโตตกต่ำ แสนสิดำขี้หลี้กะดีได้ดั่งกัน
เพราะเฮาบ่ได้ปั้นสัดส่วนทำเอา เป็นนำบุญของเฮาแต่งเอาบ่มีได้
เป็นผู้หญิงควรได้ทำใจให้ถ้วนถี่ การงานมีให้ค่อยฟ้าวการย้าวให้ท่วงทัน
อย่าผลัดวันประกันไว้แนวใด๋มันทำยาก แสนลำบากแนวเฮาเป็นแม่บ้านหลายด้านสิทับถม
อย่าไปงมนำชู้หลงชูผัวผู้อื่น ให้ค่อยบุกคอยบืนนำผัวโตและลูกเต้าจั่งสมเหง้าเผ่าหญิง
เถิงยามกินให้เจ้าวิ่งตกแต่งแปรงภาช์ ผัวหาปลามาเถิงให้ค่อยคัวแกงต้ม
งมนำหมอนนำมุ้งรุงรังยากหลายอย่าง ถักทอไว้ถ้าอ้างต่างหน้าเพื่อนฝูง
ห่าพ่อลุงแม่ป้ามาหาย้านเพิ่นหน่าย งานผู้หญิงมันหลายยากบ่มีบ่อนแล้วให้ฝนแข้วหน่ำตะพือ
อย่าอือลือนอนเล่นกลางเว็นเวียกบ่หล่ำ มันสิพาต่ำต้อยหนาวจ้อยสิห่มหยัง.....ฯลฯ......